Сүүлийн үед эрэгтэй хүмүүс эмэгтэй хүний хувцас өмсөж, загварын алхаагаар алхаж буй бичлэгүүд цахим орчинд тренд болж байгаа билээ. Тэгвэл тус трендийг дуурайж бичлэг хийн, цахим орчинд тавьж, хүмүүсийн хайрыг хүргээд буй хүү болох Эрдмийн өргөө цогцолбор сургуулийн зургаадугаар ангийн сурагч С.Төгс-Эрдэнэтэй ярилцлаа.
-Ярилцлагын эхэнд өөрийгөө танилцуулахгүй юу?
-Намайг Соёмбын Төгс-Эрдэнэ гэдэг. Би Эрдмийн өргөө цогцолбор сургуулийн зургаадугаар ангид сурдаг. Аав, ээж, хоёр дүүгийн хамт амьдардаг.
-Анх яагаад ийм хөгжилтэй бичлэг хийе гэж бодсон бэ?
-Манай ээж фейсбүүкээс тэр бичлэгийг үзчихээд, хийе гэсэн. Тэгээд л хийсэн юм.
-Энэ бичлэг дээр өмссөн хувцас хэнийх вэ?
-Эхлээд дүүгийнхээ туфлийг өмсөх гэтэл надад багтахгүй байсан. Тийм болохоор би ээжийн өндөр өсгийтэй гутлыг өмссөн. Анх удаагаа өмссөн болохоор уначих гээд эвгүй байсан. Хоёр удаа бичлэг хийсэн. Эхнийх дээр нь өөрийнхөө хувцсыг өмсөөд дараагийнх дээр нь тэр бичлэг дээрх хувцсаа өмсөөд хийсэн.
-Бичлэгээ хийхдээ гэрийнхнээсээ зөвлөгөө авсан уу?
-Ээж намайг хошин царай гаргаарай гэсэн. Мөн инээдтэй эргээрэй гэж хэлсэн.
-Ирээдүйд ямар мэргэжилтэй хүн болохыг хүсдэг вэ?
-Би том болоод урлаг, хошин шогийн талын хүн болно. Учир нь би багадаа жүжигчин болно гэж мөрөөддөг байсан.
-Ямар хичээлдээ илүү дуртай вэ?
-Миний хамгийн дуртай хичээл бол биеийн тамир, физик, хими, биологи. Энэ хичээлүүд надад сонирхолтой санагддаг учраас би хийх дуртай.
-Чөлөөт цагаараа юу хийдэг вэ?
-Заримдаа эмээтэйгээ гарч салхилангаа сагс тоглодог. Сагсны дугуйланд явж байсан. Хөлс гаргадаг маш сонирхолтой тоглоом санагддаг. Мөн шоо эвлүүлж сурч байгаа.
-Зуны амралтаа хэрхэн өнгөрүүлдэг вэ?
-Зуны амралтаараа би гэрийнхэнтэйгээ Завхан аймгийн Их-Уул суманд байдаг өвөө, эмээгийндээ очдог. Хөдөө очоод морь унаж, хонь хариулж, үхрээ тугалтай нь нийлүүлэхгүйн тулд эргүүлдэг. Тугал татах хамгийн хэцүү ажил санагддаг. Яагаад гэвэл тугалдаа чирэгдээд байдаг. Анх хөдөө очоод өндөр уулан дээр гарахаас айдаг байсан.
-Баярлалаа. Сурлагын амжилт хүсье.
-Баярлалаа.
Н.УЯНГА
