“Саарал ус хаанаас олж авах нь машин угаалгын газруудын үүрэг учир тэд өөрсдөө шийдэх ёстой”

Усны газрын дарга З.Батбаяр өнөөдөр (2023.01.04) хэвлэлийн хурал хийлээ. 

Тэрбээр “Сэлбэ голд сүүлийн 30 орчим жил ажиглагдаагүй халиа дошин үүсэж байна. Бид үүнийг “өвлийн үер” гэж нэрлэсэн. Халиа дошин ийм хэмжээнд хүрсний шалтгаан нь, өнгөрөгч зун болсон үерийн улмаас хөрсний усны түвшин дээшилсэн. Нөгөө талаас, Ногоон нуур байсан газрын намгийг хатааж, хөрсний усны түвшин доошлуулах төхөөрөмж барьсан. Тэр хөрсний усаа сэлбэ гол руу хаядаг. Энэ төхөөрөмжийг байрлуулснаас болж байна. Халиа дошин үүсэх явц нь харьцангуй удаан учир хүний амь насанд хохирол учруулахгүй. Гэхдээ Сэлбэ голын дээгүүрх гүүр, инженерийн байгууламжуудад эрсдэлтэй. Гэнэтийн дулаарал болбол шар усны үер болох аюултай. Тиймээс хөрсний усыг зайлуулна гэдэг нь хэн нэгний дураараа хийдэг асуудал биш.  Хүний амь настай холбоотой учир ийм үйлдэл хийхгүй байхыг анхааруулж байна” хэмээн хэллээ. 

Үргэлжлүүлэн тэрбээр машин угаалгын газрууд саарал ус ашиглахтай холбогдуулан “Нэгдүгээр сарын 1-нээс машин угаалгын газрууд цэвэр усаар машин угаахгүй байхаар болсон. Энэ асуудалд Ус сувгийн удирдах газар тодорхой арга хэмжээ авч байгаа гэж найдаж байна.

Хоёрдугаарт, бид үр хүүхдийнхээ ирээдүйн төлөө боломжтой газруудад нь цэвэршүүлсэн усыг ашигладаг байх хэрэгтэй. Тиймээс төрийн хүчээр хаах биш, өөрсдөө хүсэж өөрчлөх зорилгоор байгууллагуудад хүсэлт өгсөн. Одоо иргэний нийгмийн байгууллагуудад хүсэлт тавина. Ингэхдээ Улаанбаатар хотод байгаа 150 гаруй машин угаалгын газруудаар тойрч үзэж, цэвэр ус хэрэглэж буй газруудын мэдээллийг бидэнд өгөөч гэж байгаа юм. Үүний дараа бид цэвэршүүлсэн ус хэрэглэхгүй байгаа газруудаар битгий үйлчлүүлээрэй гэдэг уриалгыг гаргана. 

Мөн арьс ширний үйлдвэрүүд цэвэр усыг ашиглаж их хэмжээний хортой, химийн бодистой усыг гол руу, эсхүл цэвэрлэх байгууламж руу хийдэг. Тиймээс тэдгээр үйлдвэрийг саарал ус ашиглахыг уриална” гэв.

Үргэлжлүүлэн тэрбээр сэтгүүлчдийн асуултад хариуллаа.

-Саарал ус ашиглах технологийн үндсэн арга барил манай улсад нэвтрээгүй учир автомашин угаалгын газрууд цэвэр ус ашигласаар байна. Үүнд анхаарч байгаа юу?

-Талх үйлдвэрлэж буй хүнд гурилыг нь нийлүүлдэггүй. Үүнтэй адил машин угаалгын бизнес эрхэлж байгаа хүмүүс шаардлагатай хямдхан усаа өөрсдөө олж авах ёстой. Энэ нь тэдний үүрэг.  2008, 2009 оны үеэс дэлхий даяар 50 ам.доллароос 50 сая ам.доллар хүртэлх бүх төрлийн, бүх хэмжээтэй ус цэвэршүүлэх тоног төхөөрөмж гарсан. Мөн бассейн, сауны дэргэд машин угаалга ажиллуулаад тэндээсээ 100 хувь усыг дахин ашиглаж байгаа газрууд ч байна.

ШУУД ДАМЖУУЛАЛТ ҮЗЭХ: 

А.ОЮУНДАРЬ