Ардчилсан нам өнөөдөр (2024.01.18) “4/11” ээлжит мэдээллийн цагаараа цаг үеийн асуудлуудаар мэдээлэл хүргэлээ.
АН-ын Хэрэг эрхлэх газрын дарга Н.Лхагвадорж “Монгол Улс сүүлийн найман жилийн турш хулгай, авлига ярьсаар хөгжихгүй, хойшоо ухарсаар байна. Ээлжит сонгуулийн жил эхэлж буйтай холбогдуулан иргэдийн зүгээс АН-ыг хэвлэлийн хурлаараа байнга сануулаарай гэсний дагуу хэд хэдэн тоо баримтыг хүргэе.
2019 оны дөрөвдүгээр сарын 3-нд 49 хүнийг ЖДҮ-ийг дэмжих сангийн хулгайтай холбон зарласан. ЖДҮ-ийн сангийн 96.2 тэрбум төгрөгийн хулгайд хэн хариуцлага хүлээсэн бэ.
Хоёрдугаарт, нүүрсний 40 их наядын хулгай яасан бэ. Авлигын төлөө дуугарсан эгэл жирийн шударга иргэдийг хорьдог тогтолцоог бид өнгөрсөн хугацаанд харлаа.
Гуравдугаарт, Хөгжлийн банкны 2.3 их наядын хулгай. 2022 оны нэгдүгээр сарын 31-нд нийт 34 хүнийг Хөгжлийн банкны хулгайтай холбоотойгоор зарласан. Энэ хүмүүсээс хэн нь хариуцлага хүлээсэн бэ. Хэн ч хүлээгээгүй.
Ковидын үеийн 20.3 их наядын хулгай. Ард түмнийг “улны” гэж цоллосон тэр эмэгтэй өнөөдөр энэ их хулгайдаа хариуцлага хүлээсэн үү. Ковидын хулгайтай холбоотойгоор хэн хариуцлага хүлээсэн бэ.
Дараагийнх нь, автобусны хулгай. 328 тэрбум төгрөгөөр БНСУ-аас хуучин автобус худалдаж авчраад, ард түмэнд түүнийгээ шахах гэсэн нь үйлдэл дээрээ баригдсан. Ногоон автобустай холбоотойгоор хэн хариуцлага хүлээсэн бэ. Ногоон автобусны сонсгол хийхийг манай нам шаардсаар байна” хэмээн хэллээ.
Х.ТҮШИГ
