Эммануэль Макроны Пүрэв гарагт Парис хотноо Сорбоннын их сургуульд хоёр цаг хэлсэн үгийн гол утга нь “Нэгэнт нотлогдсон гэнэн зангаасаа бид салах ёстой, эс тэгвээс энэ зан маань Европыг сүйрэлд хүргэж магадгүй болоод байна” гэсэн ноцтой сэрэмжлүүлэг байв.
Францын Ерөнхийлөгч хэрэв Европ өөрчлөгдөж буй ертөнцөд оршин тогтнохыг хүсч байвал хурдан дасан зохицох ёстой гэж тэмдэглэжээ. Тэрбээр “Манай Европ мөнх бус гэдгийг бид ойлгох ёстой. Тэр үхэж магадгүй. Бүх зүйл бидний хийх сонголтоос шалтгаална, эдгээр сонголтыг одоо л хийх хэрэгтэй” гэж хэлсэн юм. Макрон албан тушаалаа авсныхаа дараахан 2017 онд Сорбонна их сургуульд илтгэл тавьж Европын Холбоог батлан хамгаалах болон эдийн засгийн салбарт бие даах чадвараа дээшлүүлэхийг анх уриалсан билээ.
Түүний Европын сонгууль болохоос хэдхэн долоо хоногийн өмнө хэлж буй энэ үг нь өөрийн Сэргэн мандалтын намын нэр хүндийг дээшлүүлэх гэсэн оролдлого гэж ажиглагчид дүгнэжээ. Учир нь түүний нам одоогийн байдлаар хэт барууны популист Марин Ле Пенийн намаас хол хоцорч байгаа юм.
Макрон “Европ өнөөдөр дэлхий дахинд нүүрлэж буй өөрчлөлтөнд бэлэн биш гэсэн гутранги үзэлтэй байгаа нь Оросын дайсагнал, АНУ-ын “сонирхол” буурч буй байдал, Хятадын өрсөлдөөн зэрэг нь Европын Холбоог бага нөлөөтэй “арчаагүй” нийгэмлэг болгон хувиргаж магадгүй” гээд “Европын Холбоо Оросоос эрчим хүч, бордоо худалдаж авч, үйлдвэрүүдээ Хятад руу шилжүүлж, аюулгүй байдал нь АНУ-аас хамааралтай байсан үе өнгөрсөн” гэж хэлжээ.
Тэрбээр Европын удирдагчдыг батлан хамгаалах болон эдийн засгийн асуудлаар “том стратегийн шийдвэр” гарган хариу арга хэмжээ авахыг уриалж, Европын ашиг сонирхолд одоо их хэмжээний протекционизм шаардлагатай байгааг онцлон тэмдэглэв. Тэрбээр “Европ шаардлагатай тохиолдолд АНУ-ын тусламжгүйгээр дайн хийх боломжтой бие даасан батлан хамгаалах найдвартай системийг бий болгох хэрэгтэй байна” гэж уриалжээ.
Г.АМАРСАНАА
