БОАЖЯ-наас Бүх нийтээр мод тарих үндэсний өдөр болон бусад цаг үеийн асуудлаар өнөөдөр (2024.04.30) мэдээлэл өглөө.
Тодруулбал, Бүх нийтээр мод тарих үндэсний өдрийн хүрээнд нийслэлийн хэмжээнд төвлөрсөн найман байршилд мод тарих үйл ажиллагааг тавдугаар сарын 11-18-ний өдрүүдэд зохион байгуулахаар төлөвлөжээ. Энэхүү арга хэмжээнд Улаанбаатар хотод үйл ажиллагаагаа явуулдаг 310 орчим байгууллагуудын ажилтан албан хаагчид хамрагдах юм байна.
“Бүх нийтээр мод тарих үндэсний өдөр”, “Тэрбум мод үндэсний хөдөлгөөн”-ий хүрээнд төвлөрсөн байршилд 2021 оны намрын улирлаас эхлэн таригдсан моддын өвөлжилтийн дараах тооллого, амьдралын хувийг тогтоох, нөхөн тарилтыг зохион байгуулах, тарьсан моддын усалгаа, арчилгааг тарьсан байгууллага, аж ахуйн нэгж, иргэдийг оролцуулан гүйцэтгэх ажлыг энэ онд зохион байгуулахаар төлөвлөжээ.
Мөн “Ойжуулалт” хөтөлбөрийн хүрээнд Засгийн газрын үйл ажиллагааны хөтөлбөрт тусгагдсан ойгоор бүрхэгдсэн талбайн хэмжээг 8.6 хувьд хүргэхээс гадна,
➢ “Зориудаар ойжуулах, байгалийн сэргэн ургалтыг дэмжих замаар доройтсон ойг ойн нөхөн сэргээх, гол нууруудын татмыг ойжуулах ажлыг 2.4 мян.га талбайд явуулж дөрвөн сая мод тарина;
➢ Цөлжилтийг сааруулах хамгаалалтын ойн зурвас, агро ойн аж ахуйг дөрвөн байршилд 130 га талбайд байгуулна;
➢ Мод үржүүлгийн газруудын хүчин чадлыг нэмэгдүүлэх, тарьц суулгацын нөөц бүрдүүлэх ажлын хүрээнд техник тоног төхөөрөмжийн дэмжлэг үзүүлнэ;
➢ Хөвсгөл, Завхан, Дорнод аймгуудын ойн санг бүртгэх, ой зохион байгуулалтын ажлыг 5 сая га талбайд зохион байгуулна;
➢ Ойн арчилгаа, цэвэрлэгээний арга хэмжээг 1.3 мян.га талбайд зохион байгуулна;
➢ Ойн санг хамгаалах, ойн хөнөөлт шавжтай тэмцэх арга хэмжээг 330 мян.га талбайд зохион байгуулан 1.2 тэрбум модыг доройтолд өртөхөөс хамгаална;
➢ Ой, хээрийн түймрээс урьдчилан сэргийлэх арга хэмжээний хүрээнд 400 км түймрийн зурвасыг шинээр байгуулах, 235 км зурвасыг арчлах ажлыг зохион байгуулна” хэмээн төлөвлөжээ.
