Хөвсгөл аймгийн цагдаагийн газарт “баавгайд бариулж нас барсан байж болзошгүй” гэх хэрэг өнгөрсөн сарын 31-ны өдөр бүртгэгдсэн. Дуудлагын дагуу цагдаагийн алба хаагчид хэргийн газар руу явахад машинтай очих боломжгүй байсан бөгөөд цагдаагийн алба хаагчид 100 гаруй км газар мориор явж очжээ.
Улмаар тус аймгийн иргэн Б нь тавдугаар сарын 20-ны өдөр бугын эвэр түүхээр Цагаан-Үүр суманд очиж тавдугаар сарын 27-ны өдөр ойд явж байхдаа баавгайд бариулж нас барсан байж болзошгүй гэх нөхцөл байдал урьдчилсан байдлаар тогтоогджээ.
Аялал жуулчлалын үе эхэлж байгаа энэ үеэр иргэд ан гөрөө хийх, эмийн ургамал түүхээр баталгаагүй зам маршрутаар явж амь нас, эрүүл мэндээрээ хохирох асуудал байдаг тул иргэд та бүхэн өөрийн болон бусдын аюулгүй байдлыг сахин хамгаалахыг Цагдаагийн байгууллагаас сэрэмжлүүлж байна.
