Хаврын дунд сарын эхээр шуурсан хэд хэдэн удаагийн давтамжтай цасан шуурга, их хэмжээний цас мал, малчин хоёрын тамирыг нь шалгаж байна. Өвлийн зуд турханаа давсан малчид одоо л асуудалгүй боллоо гэж бодсон ч хаврын тэнгэр тараа таниулж байгаа талаар хол ойрын малчид бүгд халаглаж сууна. Эх мал хээл хаяж, тэвээрэг багатай мал цасан доороос өндийж чадахаа больсон нь тэдний шүдний өвчин болоод байгаа юм.
Үүний буруутан нь Хүнс, хөдөө аж ахуй, хөнгөн үйлдвэрийн сайд Х.Болорчулуун болж таарав. Салбарын сайд хаврын салхитай хамт найгаж яваа хэдэн малчдаа огт бодсонгүй хэмээн малчид дуу дуугаа аван түүнийг буруутгаж эхэлсэн байх юм. Учир нь салбарын сайд хивэгний экспортыг нээснээс болж хивэгний үнэ нэмэгдэж, олдохоо больсон талаар малчид, фермерүүд хэлж байна. Малын хивэг, ногоон тэжээл, боодлын өвсний үнэ тэнгэрт хадаж, өмнө нь 10-11 мянган төгрөгийн хооронд хэлбэлздэг байсан нэг шуудай хивэг өнөөдөр бүр олдохоо больсон байна. Сүүлд 25 мянган төгрөгөөр авч байсан ганц шуудай хивэг нь тасарсан талаар малчид хэлж байгаа юм. Дотооддоо бүр хивэггүй болсон юм уу гэхээр том машин дүүрэн хивэгнүүд малчны хот, ченжүүдийн агуулах бус вагонд их хэмжээгээр ачигдаж урд хөрш рүү хил давуулан гаргах болж. Хаврын хавсарга, өл дарах өвс, тэжээлгүй малчид хотоо харлуулчихгүй юмсан гээд байгаль дэлхийдээ л залбирч байгаа харагдана. Үнэтэй ч байсан авья гэж сэтгэл шулуудах ч үнэндээ гар дээр нь мөнгө, гараад хайсан ч хивэг нь олдохгүй байгаа аж. Хавсарга шуурганаас болж ямаагаа ч самнаж чадахгүй байгаа гэнэ.
Мах, сүүний үнэ нэмэгдэхээр нийгмээрээ зүхэж хараадаг хэрнээ хивэгний үнэ нэмэгдэхэд малчдаас өөр дуугарч байгаа хүн байхгүй байгаад дургүйцлээ ч мөн илэрхийлж байна лээ.
Энэ төрд малчид ямар буруу зүйл хийсэн болоод малчдаа хорлох ийм шийдвэр гаргаж байгаа юм бэ гэсэн малчдын бухимдал мал их байгаа юм. Энэ салбарт шинэчлэл хийж, малчдынхаа эрх ашгийг хамгаалж чаддаггүй юмаа гэхэд ядаж мөрөөрөө малаа маллаж яваа хүмүүстээ битгий гай бол хэмээн цахим орчинд тэд уур бухимдлаа илэрхийлэн Х.Болорчулуун сайдыг огцруулах давалгаа өрнөж байна. Нөгөө талаас гурилын бизнестэй хүн сайд болж хивгээ өндөр үнээр экспортод гаргах хувийн бизнестээ анхаарч байгаагаас хэдэн малчдаа огт анхаарахгүй, атга хивэгний учрыг олчихгүй байгаад тэд сэтгэл дундуур явдгаа нуулгүй хэлцгээж байна.
Хаврын тэнгэр тараа таниулсан энэ хахир өдрүүдэд хэдэн малаа дагаж гундуухан яваа малчид Засгийн газар, Хүнс, хөдөө аж ахуй, хөнгөн үйлдвэрийн сайд нь нэрмээс болж дарамт болохгүй байхыг заавал дамжуулж өгөөрэй гэсэн юм.
Э.ЭНХ
