Улаанбаатар хотод бороо үргэлжлэн орсны улмаас голын усны түвшин нэмэгдэж, үерийн далан сэтрэх, голын дагуух айл өрх усанд автах зэрэг хүндрэлтэй нөхцөл байдал үүссэн тул холбогдох байгууллагууд газар дээр нь шуурхай арга хэмжээ авч ажиллаж байна. Энэ үеэр холбогдох албаныхан дараах тайлбарыг хийсэн юм.
Сүхбаатар дүүргийн Онцгой байдлын хэлтсийн дарга Д.Бэхбаяр:
-Сүүлийн хоёр өдөр бороо үргэлжилж орсны улмаас нөхцөл байдал хүндэрч байна. Сэлбэ гол дагасан орон сууцууд, зуслангийн бүсийн айл өрхүүд усанд автах тохиолдлууд гарч эхэллээ. Үүссэн нөхцөл байдалтай холбогдуулан онцгой байдлын байгууллага, мэргэжлийн анги, албад, нийслэлийн холбогдох газрууд эдгээр байршил дээр ажиллаж, арга хэмжээ авч байна. Сэлбэ голын дагуух эрсдэлтэй бүсэд 1000 айл өрх амьдардаг. Тэдэнд сэрэмжлүүлэг, мэдэгдэл өгч ажиллаж байна. Дөнгөж сая манай аврагч хоёр хүүхдийг уснаас гаргалаа.
Сүхбаатар дүүргийн Цагдаагийн газрын дарга, цагдаагийн хурандаа Т.Баатар:
-Үер буусан, усанд автаж хүндрэлтэй нөхцөл байдал үүссэн байршлууд дээр цагдаагийн алба хаагчид ажиллаж байна. Бид онцгой байдлын алба хаагчдын ажиллах нөхцөлийг хангах, замын хөдөлгөөнд хяналт тавих зэргээр үүргээ гүйцэтгэж буй. Тухайлбал, Сүхбаатар дүүргийн цагдаагийн газраас энд 20 алба хаагч ажиллаж байна, дахин 20 алба хаагч нэмж ирнэ. Бид орон сууцны барилгуудын доод давхарт байгаа техник хэрэгслүүдийг гаргах, болзошгүй аюулаас сэрэмжлүүлэх, усанд автсан талбайд шороо, элс асгуулах арга хэмжээ авч байна. Одоогоор манай дүүргийн нутаг дэвсгэрт иргэд гэмтэж бэртсэн, хохирсон гэх мэдээлэл ирээгүй гэсэн юм.
