Монгол Улсын Ерөнхийлөгч У.Хүрэлсүх өнгөрөгч долоо хоногт Их Британийг зорьж, III Чарльзийг хаан ширээнд залах ёслолд оролцсон. Төрийн тэргүүнтэй хамт МАН-ын ерөнхий нарийн бичгийн дарга, ЗГХЭГ-ын дарга Д.Амарбаясгалан дөрөө харшуулсан байгаа юм. Ингэхдээ МАН-ын генсекийн хувиар уу, ЗГХЭГ-ын даргын ажлаар хамт явсан уу гэдэг нь анхаарал татна. III Чарльзийг хаан ширээнд залах МАН-ын генсект хамааралтай асуудал биш. Төрийн айлчлалын хүрээнд Д.Амарбаясгалан явсан бол Гадаад харилцааны сайд Б.Батцэцэг бус яагаад заавал ЗГХЭГ-ын дарга явах болов. Өмнө нь У.Хүрэлсүх Ерөнхийлөгч Японы эзэн хааныг хаан ширээнд залах ёслолд оролцохдоо Гадаад харилцааны сайд Б.Батцэцэгтэй хамт явж байсан.
У.Хүрэлсүх, Д.Амарбаясгалан нарын эзгүйд нүүрсний бүлэглэлийн хамгийн том толгойлогч гэгдэх Б.Ганхуяг Чингэлтэй, Баянзүрх, Сүхбаатар дүүргийн Эрүүгийн хэргийн шатны шүүхийн шийдвэрээр суллагдсан. Таван сар хоригдож, шалгагдсан Б.Ганхуягийг шалгаж дуусаад сулласан уу, хэн нэгний нөлөөллөөр суллах шийдвэрт хүрсэн үү гэдэг нь анхаарал хануулах сэдэв мөн. Төрийн тэргүүн болон ЗГХЭГ-ын даргын эзгүйд Б.Ганхуягийг суллаж, прокурорын шийдвэрээр дахин хорьсон нь санамсаргүй тохиолдол байсан гэхэд үнэмшил муутай. Шууд утгаар нь тэдэнд наах боломжгүй ч өнцөг яалт ч үгүй тэднийг чиглэж байна.
У.Хүрэлсүх, Д.Амарбаясгалан нар нүүрсний хулгай, Хөгжлийн банк, Засгийн газрын “5 Ш” ажиллагаа, Үндсэн хуулийн нэмэлт, өөрчөлт, Улс төрийн намын тухай хууль, Сонгуулийн тухай хууль, ирэх жилийн сонгууль цаашлаад намын жагсаалтаар орж ирэх хүмүүсийн нэрсийг урьдчилсан байдлаар тохирохоос эхлээд олны хөлөөс хол ярилцах нь хардлага бага дагуулна. Ерөнхийлөгчийн өрөө рүү өдөр бүр гүйснээс хамт явж улс төрийн нөхцөл байдлаа ярилцах нь илүү амар л даа. Төрийн тэргүүний зүгээс ямар шаардлага тавьж, МАН-ын генсек хэрхэн хүлээж авав гэдгээс асуулт эхэлнэ. Ерөнхийлөгч өнгөрөгч оны сүүлээс эхлэн МАН-ын Бага хурлыг зарлан хуралдуулж, ЕТГ-ын даргаар ажиллаж байгаа өөрийн баруун гар гэгдэх Я.Содбаатарыгаа МАН-ын генсекээр томилуулах шахалт өгч байсан ч нүүрсний хулгайн жагсаалыг давж чадалгүй зогссон. Залуу дүү нар нь ч түүнд тэгж найр тавихыг хүсээгүй.
Нүүрсний гэгдэх хэрэгт холбогдсон хүмүүсийн нэрс ил болж, Ерөнхий сайдын шударга ёсны төлөөх тэмцэл эхлэх үеэс хойш Д.Амарбаясгалан Ерөнхийлөгч У.Хүрэлсүхийн элгэнд наалдсан дэлүү шиг дэргэдээс нь салахаа больсон гэж намынхан нь ярих болсон. Тиймээс сүүлийн үеийн улс төрийн нөхцөл байдал, ярьж тохирох зүйлс нь Төрийн ордон, Их тэнгэрээс хальж, олны нүд, чихнээс хол хилийн чанадад ярих зүйл байсан нь гарцаагүй. Хана хүртэл чихтэй гэдэг үгтэйг хэн хэн нь мэдэх тул ийн шийдсэн байж мэднэ. Нэг хэсэг М.Энхболд, Т.Бадамжунай, Ц.Элбэгдорж нар болон түүний ойрын хүмүүс Сингапурт асуудлаа шийддэг гэж яригддаг байсан. Сүүлийн үед Монголын хувь заяаг Их Британи хавьд шийддэг болсон уу гэж хардах хүмүүс ч байгаа юм.
Д.Амарбаясгалан сайдын хувиар Ир Британийг зорьсон бол ирэх долоо хоногийн Засгийн газрын хуралдаанаар айлчлалынхаа үр дүнгийн танилцуулгыг хийх ёстой. Хуулиараа Засгийн газрын гишүүн гадаад улсад албан томилолт, айлчлалаар явахдаа Ерөнхий сайдад заавал мэдэгдэх үүрэгтэй байдаг тул түүний явахыг танхимын тэргүүн Л.Оюун-Эрдэнэ мэдэж байсан болж таарна. Тэгэхээр Ерөнхий сайдаасаа учиргүй зөрсөн зүйл яригдсан эсэх нь бас эргэлзээтэй. Гэхдээ олны салхинаас Л.Оюун-Эрдэнэ дурамжхан үлдсэн гэх яриа бий.
Ерөнхийлөгч У.Хүрэлсүх, Ерөнхий сайд Л.Оюун-Эрдэнэ нарын харилцаанд цав сууж, ил далд сөргөлдөх болсныг намынхан нь хэлдэг. “Би Ерөнхий сайд юм бол асуудлаа өөрөө шийддэг байя” гэх утга бүхий зүйл хэлснээс болж тэдний харилцаа хөндийрч эхэлсэн гэж яригдах болсон. Намын дарга байсан, Төрийн тэргүүн тэгээд ч Л.Оюун-Эрдэнийг өөрийг нь гаргаж ирсэн ахын хувьд мэдээж байр сууриа алдахыг хүсэхгүй. Энэ агуулгаар асуудалд хандаж, ирэх сонгуульд өөрийн хүмүүсийг квот заан дэвшүүлэхээс эхлээд нам доторх орон зайгаа У.Хүрэлсүх алдахыг хүсэхгүй. Гэхдээ бүх эрх мэдлээ гартаа авсан Л.Оюун-Эрдэнэ бүх насаараа ахын сайн дүү байж утсан хүүхэлдэй шиг баймааргүй л байгаа.
Тэр утгаараа ЗГХЭГ-ын дарга Д.Амарбаясгалан Төрийн ордны гурван давхарын зүүн жигүүр үү, хоёр давхарын зүүн жигүүр үү гэх жигүүрийн сонголт хийхээр явсан бол Засгийн газрын гишүүний хувиар бус намын Ерөнхий нарийн бичгийн даргын хувиар явсан байж таарах гээд байгаа юм.
Л.Оюун-Эрдэнэ намынхантайгаа тангараг тасарч, бүх хүний шүдний өвчин болсон шалтгаан мэдээж нүүрс. Нүүрсний хулгайг давсан Хөгжлийн банк, ЖДҮ-гийн хөнгөлөлттэй зээл гэж байхгүй. Тиймээс нүүрсний бүлэглэлтэй хийх тэмцэл эхлэхэд эрх ашгуудаараа хоёр талдаа гарцгаасан гэдгийг мартаж болохгүй.
