Монгол Улсаас БНХАУ-ын эрх бүхий байгууллагад нүүрс олборлолт, тээвэрлэлт, экспорттой холбоотой эрүүгийн хэрэгт эрх зүйн туслалцаа авахаар хүсэлт хүргүүлжээ. Хүсэлтийн дагуу БНХАУ-ын Ардын дээд прокурорын газраас энэ асуудалд анхаарч, хүчин чармайлт гарган ажиллахаа илэрхийлсэн байна.
Тодруулбал, есдүгээр сарын 18-нд БНХАУ-ын Бээжин хотноо Монгол, БНХАУ-ын Хууль зүйн яам хоорондын ялтан шилжүүлэх болон эрх зүйн туслалцаа харилцан үзүүлэх асуудлаарх дөрөв дэх удаагийн Зөвлөлдөх уулзалт болжээ. Энэ үеэр БНХАУ-ын талаас дээрх байр суурийг илэрхийлсэн байна.
Сануулахад, нүүрсний гэх хэрэгт одоогийн байдлаар 138 хүнийг яллагдагчаар татаж, 12,994 хүнээс мэдүүлэг аваад байгаа билээ.
Энэ хүрээнд өнөөдөр /2023.09.20/ УИХ-ын гишүүн асан, ХНХ-ын сайд асан Т.Аюурсайхан, “Эрдэнэс Тавантолгой” компанийн Гүйцэтгэх захирал асан Б.Ганхуяг нарын 11 хүнд холбогдох урьдчилсан хэлэлцүүлгийн шүүх хурал болж буй.
Шүүх хурлын явцын талаар мэдээллийг ЭНД дарж уншина уу.
Х.ТҮШИГ
